July 25th, 2007 做了有線幫兇

這個星期發生了連環昆人事件

有線某經理昆我地，同我地上司講，話有訪問、要同學帶樂器，其實冇講詳情做乜。我們的上司就以為有機會俾學生上位，於是前日突然叫同事立即聯絡學生，我地幾位同事於是又唔知頭唔知路打電話叫學生去，總之一片混亂，大家都唔知發生咩事。

所有同學以為我地真係咁掂，連有線都訪問。有同學住上水，專登過來中環，只為了大家團結而一起來。有同學半夜 MSN 還問我詳情，但我自己都不清不楚。

點知原來係，有線開一個網上音樂台，會攪個band 比賽，搵左明星來記者招待會，但又怕冇人支持太核突，需要一班免費臨記。於是利用徐X明的名，（因為之前上司邀請嘉賓時有邀請他），「邀請」我們的學生來扮支持這個台的地下Band。有線的員工最終也沒有向我們的老師學生作任何解釋，好明顯，係一個騙局，只不過我們發現得太遲。作為一間謀利機構，開一個謀利的音樂台，根本不應該叫人免費去做野。

結果班學生去到只是行行企企 ，仲要被逼扮 Fans 鼓掌。班學生就梗係好憤怒，認為老師/學校昆佢地。雖然老師也道歉解釋，但因為我們學校的行政出左名混亂，大多數學生可能已經不是第一次被騙。本來上星期音樂會，才剛剛建立好老師和學生的信任關係，就咁就破壞了。雖然有線奸狡，但我們成班老師，竟然如此大意，而我們並非沒有懷疑過成件事，但卻任由事情發生，反映了不少溝通問題。

要建立信任要很長時間，要破壞信任只需要一次。