June 26th, 2006 賭波

星期六上完堂返屋企途中，我人生第一次行入馬會投注站。

好多麻甩佬都在睇馬經、睇波經。我行到 counter 先知道投注要先設立戶口，贛居左添，於是門口有位著住好似係巴西波衫既少女攞張 form 俾我填，愕一愕，原來佢係職員黎既。填好 form ，申請埋張智財卡，仲有職員好仔細咁教你點用部機，仲好服務過銀行，相信個職員一定遇過好多唔識買又要學人買的羊祜。即時仲收到一份入會禮物加一份印刷精美既說明書，一邊試下試下用部機，個職員又教路，用甜美既聲音問你點解唔試下 2 拖 3，贏面高D 喎，我都其實唔明佢講乜，多數都係 tum 我落搭買多D。入左一百二十蚊，二十蚊案金，一百蚊買阿根廷贏墨西哥。就咁，我開始一生既第一次賭波。

回家，繼續閱讀說明書，裏面詳細列明各種賽馬獨贏、孖寶、三T、六環彩；足球主客和、最先入球、買單雙、神射手等等選項，真係複雜到vomiting eletrons。又單式、複式、又膽拖，乜料呀。仲複雜過 JUPAS 選科，都唔明D 阿婆阿伯點解可以明，仲肯定清楚過我多多聲。而現在賭波賭馬的方法真是多得很，可以去投注站買，可以打電話、上網、 PDA 上網、手機上網都得，真是科技發展一日千里，無論老、中、青一樣可以輕易簡單地賭錢。

我嘗試用我中學僅餘既數學知識計算賽馬中獎既概率，不過，為了方便計算，首先假設每隻馬贏既機會係均等（這個假設其實絕對唔成立），並且假設每場都有十四隻馬。(計算可能有誤，只是玩下而已）得出：

獨贏（第一名）：1/14
位置（頭三名）：3/14 ~ about 1/5
連贏（頭三名之中的第1,2名，毋須順序）：1/14 x 1/13 = 1/182
位置連贏（頭三名之任何兩名）：1/14 x 1/13 x 6 = 3/91 ~ about 1/30
連贏膽拖（1 膽 2 腳)：1/14 x 2/13 = 1/91
…. （計計下已經冇心機繼續計落去）
六環彩（任何六場的第 1 或第 2 名）：(2/14)^6 = 1/117649
六寶獎（任何六場的第 1 名）：(1/14)^6 = 1/7529536
咁你都中，你一定係馬神。

不論怎樣都好，賭馬贏既機會都大過六合彩。
六合彩頭獎既機會係：1/(49*48*47*46*45*44)=1/10068347520
不過，當然中獎機會越高，賠率越低，總之馬會一定有賺。

足智彩似乎可以不用概率計算。先看看主客和。
假設阿根廷對墨西哥有七萬人買阿根廷贏，二萬人買和，一萬人買墨西哥贏。
假設每人同樣落注 $10 。
Let X = 阿根廷贏的賠率， Y = 和局的賠率， Z = 墨西哥贏的賠率
假如馬會要賺錢，只要根據買主客和的落注金額，去設定相關賠率，馬會一定可以賺。

如果阿根廷贏，買和、買墨西哥的人便輸掉錢，只要他們輸掉的錢多過買阿根廷贏的一方賺的錢，馬會就有賺。

200,000 + 100,000 > 700,000 * X
i.e. X < 0.428, where X = 阿根廷贏的賠率

如果和局：
700,000 + 100,000 > 200,000 * Y
i.e., Y < 4, where Y = 和局的賠率

如果墨西哥贏：
700,000 + 200,000 > 100,000 * Z
i.e., Z < 9, where Z = 墨西哥贏的賠率

不過看馬會的網頁，當天阿根廷對墨西哥的主客和賠率是 1.32: 4: 9 ，因為賠率一定要大過 1 才會有人買。不過當然我還沒有計算其它項目，那些項目才是真正的有殺冇賠，例如賭哪個球員最先入球、賭哪一隊是世紀盃冠軍、賭半場成績、賭神射手。最令我嘆為觀止的是有得賭單雙同大細，咁真係同入賭場擲骰仔買大細毫無分別。買這些東西，就更加十賭九輸了。

賭波最高投注額是五十萬，冷門的球隊賠率往往可以高至九倍、十倍，看到這樣，我都有點心跳加速，辛辛苦苦打工、投資十幾年都賺唔倒咁多，真係仲不如賭一輔。當然，若果真係在網上按兩個鍵，隨時成副身家都可以輸晒。

結果當晚阿根廷 2:1 贏左墨西哥，我仲好歡喜以為自己賺左三十二蚊，點知發現原來仲有一條規則：主客和以九十分鐘成績計算，加時和互射十二碼不計算在內。九十分鐘的時候，阿根廷對墨西哥 1:1 ，算和局。話，咁你馬會玩晒啦。結果我人生的第一次賭波，明明隊波贏左，但係就輸一百蚊收場，天理何在？！ ~~~ @_@

*******

P.S. 我們只是關心球賽輸贏，對於每個參賽國家，我們又認識多少？就算報章也很少報導！我也是翻查維基才知道原來「塞黑」其實是塞爾維亞和黑山共和國，前身是南斯拉夫，以前並沒有「塞黑」，但以後也再不會以「塞黑」的名義參賽，因為五月的時候黑山共和國投票宣布獨立，這是唯一一次叫做「塞黑」。

「科特迪瓦」又是一個很少聽見的名稱，原來它叫 Côte d'Ivoire 以前被意譯為「象牙海岸」，現在卻統一用音譯為科特迪瓦。就像 Seoul 不叫漢城，叫首爾一樣。

非洲球隊之中，有三個國家都是西非的相鄰的國家。科特迪瓦曾是法國殖民地、多哥是德國殖民地、加納（以前叫「黃金海岸」）是英國殖民地。從他們國家的名字，我們知道以前殖民國就是貪婪這些地方所擁有的象牙和黃金。

同日又有兩宗和賽馬有關的新聞：
肥龍（許仕仁）呻政壇辛苦 愛駒贏馬當調劑
騎師戴勝墮馬命危
嘿，真個是：有人歡喜有人死！